Mattie Garaikoetxea Zubillagak, Navarrabiomedeko Kardiologia Translazionaleko Unitateko ikertzaileak Nafarroako Unibertsitate Publikotik egindako doktore tesia irakurriko du urriaren 24an. Ekitaldia 14:30etan hasiko da, Navarrabiomedeko Ekitaldi Aretoan.

Doktore lana, “Study of valve interstitial and endothelial cell sex differences and potential mineralocorticoid receptor antagonism benefits in chronic aortic regurgitation”, izenekoa, eta Navarrabiomedeko Kardiologia translazionaleko Unitatean garatu da, doktore hauen zuzendaritzapean:  Natalia López Andrés, unitate honetako ikertzaile nagusia eta Eva Jover García, unitate bereko Arritmien ikerketa-lerroaren arduraduna.
 

Egindako ikerketa

Aorta-gutxiegitasun kronikoa aorta-balbula diastolean osotara ez ixtean sortzen da, aortatik ezker-bentrikulura odol-fluxu atzerakoi eta patologiakoa ahalbidetuz. Mendebaldeko 65 urtetik gorako populazioaren %1.6k pairatzen duela kalkulatzen da, eta hiru aldiz maizago diagnostikatzen da gizonezkoetan.
 
Doktore-tesi honetan, aorta-balbula osatzen duten zelulen (zelula interstizialak eta endotelialak) sexu-desberdintasunak aztertu dira, geneen eta proteinen adierazpen-mailan. Gainera, zelula horietan eta 144 pazienteen balbula-ehunean mineralokortikoide errezeptorea ba ote dagoen aztertu da, haren blokeoa onuragarria izan daitekeelakoan.
 
Horrela, ikerketa honek lehen aldiz deskribatzen du gizonek fibrosi balbular gehiago dutela, eta baita aorta-gutxiegitasun kronikoa duten pazienteetan mineralokortikoide errezeptorearen farmako antagonistak onuragarriak izan daitezkeela, farmako hauen birkokatzea proposatuz.
 

Finantzaketa eta emaitzen hedapena

Mattie Garaikoetxea “Navarrabiomedeko Doktoratu aurreko laguntza 2021”-en onuraduna izan da bere tesia garatzeko. Lortutako emaitzak Heart Valve Society Annual Meeting 2025 (Kairo, Egipto) erakundearen nazioarteko kongresuan aurkeztu ditu, izenburu honekin: "Sex Differences In Aortic Valve Inflammation And Remodeling In Chronic Severe Aortic Regurgitation"